Hallo ihr wahnsinnig wunderbare Züri-Mänsche 

 

Am 28.2. am 23:53 isch di letscht Bstellig vome Züribrätt bi eus ihgange. Mir chönd leider kei neui Bstellige me ahneh.  

 

Jetzt heissts für eus ad Säck. Mir bittet eu um es Bitzeli Geduld, mir sind mit Hochdruck a de zweite Uflag, aber mir sind halt ebe scho au chli überrumplet worde. 

 

Natürlich wärdemer da und au uf eusem Insta dänn no kommuniziere, wieviel Chlütter mir dank eu tatsächlich chönd ad BCK abdrucke. Mir freued eus jetzt scho abartig druf! 

 

DANKE A JEDE UND JEDI EINZELN*I VO EU, WO EUS UNTERSTÜTZ HÄT.  

FUCK, SIND IHR GEIL. 

 

Mir sind unglaublich happy.  

 

Mit Achttuusig Liebi 

Eui Züribrätt-Crew 

Züri gaht hei...

Ä Nacht ade Langstrass. Mir vermisseds. Mir vermissed d'Clubs, d'Bars, füechtfröhlichi Nächt voller Irrwäg, bis mer irgendwänn am nächste Morge dihei ufwached.

Drum bringed mir d'Zürcher Nacht miteme einmalige und legendäre Leiterlispiel zu eu hei und unterstützed glichzitig euses finanziell ahgschlagne Nachtläbe.

De ganzi Gwünn chunt de Bar- und Clubkommission (BCK) z'guet. Alles was du mache musch: Äs Spiel chaufe und en Züri-Abig bi dir dihei erläbe.

Wie lauft das gnau?

D'Bar- und Clubkommission setzt sich i de Politik und au allgemein für's Zürcher Nachtläbe ih. Und das isch grad jetzt bsunders wichtig. Wo mir d'Idee für das Spieli gha händ, isch eus nöd nur de Spass wichtig gsi, sondern au, dass debii öppis useluegt für eusi einmalige Zürcher Nächt. Drum hämmer eus entschiede, dass mir de ganzi Gwünn, wo mir mit dem Spieli mached, ad BCK spänded. Will es vielfältigs und spannends Nachtläbe ganz en grosse Teil devo usmacht, wieso Züri Züri isch. Für das hämmer au es paar Clubs und Bars ahgfrögt, ob sie wännd mitmache und en Spot uf eusem Brätt abstaube. Und die händ imfa all «Ja» gseit. Du wirsch also tatsächlich au de eint oder ander Schuppe wieder ahträffe, wo du scho legendäri Nächt verbracht häsch.

Wänn du also sones Spiel chaufsch, holsch dir nöd nur e Zürcher Nacht zu dir hei, wo du chasch mit dinere Gang erläbe, sondern sorgsch demit au es Stuck wiit defür, dass mir alli zäme wieder chönd id Zürcher Nacht ihtauche, wänn de ganz Seich verbi isch. Züri, mir liebed di.

#züribrätt